Reel Time Presents Ang Lihim ng Pamilya

Ang bawat isang tao, may kani-kaniyang lihim. Pero may isang lihim na pinagsasaluhan ng isang buong pamilya – ang #incest rape.

Rape ang pangunahing uri ng sexual abuse sa Pilipinas. Ayon sa Center for Women’s Resources (CWR),isang babae o bata ang nagagahasa kada oras, batay na rin sa police records. Sinusundan ang rape ng incest, na tinatayang nasa 37% ng bilang ng sexual abuse cases.

Mula 2011 hanggang 2016, nasa 2,770 incest victims mula sa kabuuang 7,418 biktima ng sexual abuse ang naitala ng Department of Social Welfare and Development (DSWD). Nasa 400-500 kaso ng incest rape umano ito kada taon.

Sa tala ng DSWD, 99% ng mga biktima ng incest rape ay batang babae edad 14-17, pero may mga naitalang kaso na edad 5 taon pababa.

Pero ang mismong DSWD, aminadong hindi ito ang eksaktong bilang. Napakarami pa umanong kaso na hindi naire-report sa otoridad. Karaniwan nang binabantaan ang biktima na papatayin ang mga mahal niya sa buhay kapag nagsumbong siya. Kadalasan ding itinatago ang maitim na lihim sa loob ng pamilya dahil sa kahihiyan at stigma na bumabalot sa incest.

Sa kaso ni “Kaye”, 13 anyos, patay na ang ama nang magkalakas siya ng loob na aminin sa ina ang pang-aabusong ginawa sa kaniya. Nagbunga ang panggagahasa ng isang sanggol.

Si “Anna” naman, 36 anyos, siyam na taong gulang lang diumano nang magsimula ang pangmomolestiya sa kaniya ng sarili ring ama. Ayon kay “Anna”, alam ng kaniyang ina ang ginagawa sa kaniya ngunit hindi raw nito kinumpronta ang kaniyang ama dahil sa takot na hiwalayan siya nito. Sa edad na 13, natuloy na sa panggagahasa ang dating panghihipo lang ng ama kay “Anna”. Hanggang ngayon, binabangungot umano si “Anna” dahil sa pangyayari. Nananatili kasing nakalaya ang ama na hindi niya magawang isumbong sa kinauukulan dahil sa takot.

Anu-ano nga ba ang lagim na dulot ng pang-aabusong ito? Maaari pa bang makabangon ang isang biktima ng incest rape? Tunghayan sa Reel Time Presents Ang Lihim ng Pamilya ngayong Biyernes, Setyembre 27, 7:15 ng gabi sa GMA News TV.